السلام عليكم
رحمك الله ياباخالد ..
بالامس فقدنا رمزا غاليا وشخصيه رياضيه فذه لاتتكرر ..انسان بكل ماتحمله الكلمه من معنى ..
خبر وفاته نزل علينا جميعا كالصاعقه .. اصابتنا بالذهول ..
كنت صباح الخميس في شارع الغرابي لاجراء بعض التعديلات على السياره استعدادا للسفر ..
ووسط الزحام وتحت اشعة الشمس الحاره وصلني اتصال من اخي الاصغر الساعه العاشره والنصف
وقال سمعت الخبر ... قلت لا اي خبر قال .. ابوخالد مات عظم الله اجرك .. قلت اكيد تمزح (ماصدقت )
قال لاوالله صدق ! صدمت وذهلت وقلت الله يغفر له ويرحمه امين ..
ساعه كامله وانا امشي بشارع الغرابي واتذكر كل شيء عن ابوخالد واتخيل النصر بدونه !والرياضه السعوديه بدون الرمز الغالي ابوخالد ..
منذ صغري وانا اتمنى ان اقابل الرمز من شدة تعلقي بالنصر ومن كثر ماسمعت عنه كنت اشوفه من بعيد داخل النادي واسلم عليه مع الجمهور وامشي ..!
تحقق حلمي قبل اربع سنوات بفضل الله ثم بفضل منتدى الجماهير النصراويه اتصل علي الاخ ابوعبدالعزيز وقال ياسيف ترى رشحناك انت والطيب الغالي ومساهر انكم تروحون تسلمون جائزة الجماهير لافضل لاعب وهو الخوجلي وترى نسقنا بتقابلون الرمز .. قلت تمام اشكركم على الثقه ومتى نروح قال .. اليوم وتسليم الجائزه بعد التمرين ..
وصلنا النادي ودخلنا على ابوخالد في مكان جلوسه بالملعب انا واخي ومساهر والطيب الغالي ..
رغم انه اول لقاء معه واول مره يشوفنا وحتى اسمائنا مايعرفها الا ان ابوخالد يسلم على الواحد كنه يعرفه من زمان ..
في البدايه كنا منحرجين وماندري من وين نبدا .. ومع مرور الوقت وببساطة ابوخالد وروحه المرحه اخذنا على الجو تماما .. وصرنا نتبادل الحديث معه ونطرح كل مايدور في ذهننا من اسئله ..
الحديث معه ممتع للغايه ..ومهما كانت الاسئله يتقبلها بكل رحابة صدر ويعطي كل سؤال حقه في الاجابه ..
اذكر اثناء الحديث عن استقالته والمطالبين بها .. قلت يابوخالد انت لو تروح احنا بعدك مثل الايتام وضرب على يدي وقال لالالالالالا اشكرك ياعزيزي وانا اقدر وعارف حب الجماهير لي ..
استمر الحديث معه اكثر من ست ساعات مرت كدقائق لم نشعر بها ..!
في كل كلمه يقولها نشعر بمدى روعته وتواضعه ..
بعض الناس اصحاب المناصب حتى لو كان من عائلتك وقريبك يعاملك بجفاف ويسلم عليك ببرود ولامجال للمقارنه بين هؤلاء وابوخالد رمز التواضع والتقدير لمن يعرف ومن لايعرف !
اذكر اثناء حديثنا معه اتصل عليه رئيس نادي الرفاع البحريني وكان سيصل للرياض في اليوم التالي وبيتعشى عند ابوخالد ..ولما انتهت المكالمه قال ابوخالد تراكم معزومين عندي للعشاء بكره لاتنسون ..
في اخر اللقاء وكنا بنمشي وكان لقائنا معه قبل النهائي مع الاتحاد قلنا ابوخالد ان شاء الله بعد اسبوع نجي ونبارك لك بالبطوله ؟ قال بصوت عالي لييييييييييييييييييش والعشاء بكره .. فناظرنا بعض وضحكنا اعجابا من شدة تواضعه وتعامله الاخوي قلنا خلاص ان شاء الله .. !
بعد شهر من هذا اللقاء او اكثر اتفق اعضاء المنتدى على الذهاب لمقابلة ابوخالد في بيته .. حضرت انا وعدد كبير من الجماهير .. ولما دخل ابوخالد وبدانا بالسلام عليه سلم علي وابتسم وكانه تذكر هالوجه ! قلت انا اللي قابلتك بالنادي قبل شهر ..!! تتخيلون ابوخالد وش قال ؟؟
قال وهل يخفى القمر ! صاحب السمو الملكي الرمز الرياضي الكبير يقولها لمشجع بسيط مثلي !!
هل عندنا شخصيه بمثل هذا التواضع ! شخص يقدرك ويحترمك مهما كنت لمجرد انه يعرف انك مشجع نصراوي !!
والله العظيم خسارتنا كبيره جدا بفقدان الرمز وانا الان اتذكر مقولتي له نحن بعدك ياابوخالد مثل الايتام
رحمك الله يااباخالد اللهم ارحمه وتقبله قبولا حسنا ياغفور يارحيم ..
وهنا تذكرت موضوعا قديما لي كتبته بعنوان حبيبي عبدالرحمن بن سعود اقتتطع منه الجزء التالي
((حال النصر اليوم غريب ..غريق يسبح عكس التيار ..
تيار الرعايه وتيار الصحافه وتيار التحكيم ..
ان لم تكن ذئبا اكلتك الذئاب ..
ذئاب الاعلام وذئاب المال وذئاب النت ..
والنصر يكره الوحوش .. لذلك لم ولن يصبح ذئبا ..
ولكن من رجالات النصر هناك أسد .. جعل الاخرين من نصره ينامون .. لانه يكفي ..
عبدالرحمن بن سعود .. اول اسم احفظه ليس من اقربائي ..
اسم تردد في الطفوله في حقول النخيل والنعناع وعند البركه ! ..
بدأت ابحث واسأل عنه .. تعددت الاوصاف ..واختلف التعريف !
قرأت عنه .. لمن مدحوه .. ولمن انتقدوه ! فوجدته حكايه من الف ليله وليله !
وجدت فيه ارادة جان فالجان في البؤساء ! وفيه من عمل روبنسون كروزو في الجزيره !
ابوخالد محامي لم يعمل بالمحاماة ,, دكتور بلاشهاده ..جنرال بلامرتبه ,,
سياسي اكثر من السياسيين ..لعب مع الكره اكثر من اللاعبين ,,
هو ممن يمسكون بالوسيله والهدف معا,, محبته شهره ..عداوته شهره .. نقده شهره ..وجوده شهره ..,,
تخلى عن التجاره من اجل نصره ,, تخلى عن المناصب من اجل نصره ,,
يختلف معه الكثيرون ويتفق معه الكثيرون ! يختلف عليه الكثيرون ويتفق عليه الكثيرون !
هو من اكثر الناس تحدثا حتى وهو صامت ! مقاتل من الدرجه الاولى !
صنع مجدا لفريقه ونجاحات ! كان يملك كل شيء ! عشق الكثيرون النصر بسببه !
اطلق عليه ابنه لقب الرمز ! فانتقدوا الرمز لانه اكبر منه !
يقل محبوه ويزداد كارهوه اوالعكس لافرق ,,
هو يدري انه في وسط رياضي ,, فيه المكسب والخساره مثل البورصه ,,
في الماضي كان يملك كل ادوات النجاح ,, الان اعترف ابوخالد بان الوقت تغير ,,
ولم يعد يملك لوحده الكثير منها ,, كان رجل النادي ولايريد ان يكون النادي رجل !
لذلك هو عود من طرف حزمه ! ولكن ماذا لوكانت الحزمه كلها عود ! الكل يصل لمفترق طرق الا هو !
فلن يتوقف عشقه لنصره ولن يهتز ! يطالبه الكثير بالبطولات وهو اكثر من يتمناها ويعمل لها !
هو اول من طالب بالاحتراف واكثر من يشتكي منه ! لانه احتراف اخر صنعه غيره فظهر ناقصا !
يطالب بخصخصة الانديه ليكتمل !ابوخالد قصة عشق لن تنتهي ,, ابوخالد مضرب مثل ..,,
تواضع .. لاحدود له ,, ابوخالد ..النصر ,, ابوخالد ..بسمته ..ضحكته .. بطوله ,,
البطوله بدونه ليست بطوله ,, ))
تحياتي |
ابوخالد احنا بعدك مثل الأيتام 
ابو خالد كنز لم نحسن استغلاله ... ابو خالد كنز ثمين .. رحمك الله يابو خالد 
