السلام عليكم ورحمة الله وبركاته ..
من هنا ومن خلف مركاي العريقه وبجوار علبة الببسي اللي مشروب منها النص احييكم وانا منشكح المشاعر ومبسوط حبتين لان ( عبودي ) جايب لي كرت زواج اخته وكاتب على الكرت / خاص الى اغلى الناس
نعم انبسط ونعم انشكح وخشمي يتفطر فرحا وجبهتي تفنقس وناست(ن) لانني تأكدت ان اخوان ( عبودي ) ماعندك احد لانهم تاركينه يعطيني كرت زواج اخته بس المشكلة اني قريت داخل الكرت مكتوب تتشرف حرم / فلان الفلاني بدعوتكم لحضور حفل زفاف ابنتنا / هايدي
لذلك اطرح هذا التساؤل امامكم يااعضاء هذا المنتدى العريق للاجابة عن استفساري البسيط وهو /
الحين يوم يعطيني عبودي كرت الزواج اللي واضح انه كرت نسائي هل هو يعتقد اني بنت ؟
ام انه اعطاني هالكرت بالغلط لانه كان مستعجل ومادقق بالكرت من فرحته بالكروت ولكي اكون اول واحد يدعيه لهذا الحفل
ام لا شيء مماسبق
<---- وسوسة اختبارات
افيدوني جزاكم الله خير
خلونا نفتك من سالفة الكرت وخلوني اعلمكم من اللي قلط بالملحق لمتابعة المباراة النارية ( هولندا والبرتغال ) وهم من اليسار علشان نجدد /
عبودي ( ياحياة الشقا ) جايني وهو كاشخ بثوبه الجديد حق زواج اخته وقاعد يوريني شلون سوى القلابي وبحكم خبرتي بمجال الخياطة علمته ان رقبته اقصر من القلابي وطالع شكله كنه زيدي راضع من عجوز تنزانية وعجزو يفطمونه صح انه حقد علي بس بالاخير أشرت له بالمنديل ورضى علي
( فايز ) الحول وكان دخوله للملحق نفس دخوله المرة الاولى لان الولد ماله بالكوره ولايحبها ويعتبرها من اسباب انحطاط اغاني شعبان عبدالرحيم وقصة دخوله للملحق اليوم انه بعد صلاة العشاء كان راجع من المسجد يبي بيتهم وفي الطريق جت كامري مسرعه وكبست النور على عيون الحول مما سبب بميلان الغده الدرقيه عنده وزيادة حولانه حتى انه اخذ اللفه حقت الحاره وهو مميل ظهره ويجيك داز طبلونه برجوله ويمحط على راسه بوسط الزفلت ونجي نشيله ويقول لنا / تكفون لايدري ابوي عن طيحتي ثم يحرمني من المصروف علشان كذا اخذناه ودخلناه الملحق وقعدنا نحط على راسه كمادات
غازي القصيبي / حق الوظايف سمع عن ملحقنا ومن زود حبه للسعوده سير علينا وقهويناه ورفض يشرب القهوة وطلع من مخباه بليلة وقعد يدبغ فيها قدامنا
_____________________________________
( هولندا ) *( البرتغال )
بدأت المباراة الساعه العاشره تماما بتوقيت الدخل وشارع الغروب وعلى القاطنين خلف كوبري الميه مراعاة فارق التوقيت
وسنترو الشباب الكوره بس تراي ماادري من سنتر الكوره لاني كنت قاعد اعلم عبودي اني قدمت على كلية الملك فهد الامنية في سنه من السنوات وقاعد اهايط عليه اني شفت عسكر كل بدلاتهم العسكرية نجوم واني انا كنت القمر بينهم ويوم خلصت من هذا الهياط ناظر فيني عبودي وقال / افهم من كلامك انهم فصخوك ؟
يوم سمعت هالكلمة قمط وجهي وصار كنه قطعة تونه ريو ماري بعد التخفيضات ثم تمالكت نفسي وقلت له / ترى عادي ان يفصخ الشخص من اجل خدمة وطنه خخخخخخخخخخخخخ
وقمت بأصرف الموضوع رحت للتلفزيون ارفع الصوت ويوم رفعته الا اشوف الحكم معطي لاعبين من هولندا كرتين صفراويين والدقيقه ماوصلت سبعه وانا اللي تكربن اخلاقي واقعد اهاوش الحكم واسوي حركات قدام التلفزيون بس ترى مااحد شافني
المهم صار اللعب كنه هياط بين المنتخبين هنا هجمه وهناك هجمه حتى وصلت المباراه للدقيقه ثلاثه وعشرين وتوصل كوره على الطرف الايمن عند ديكو اللي يستلم الكوره ثم يعرضها قدام المرمى ويصيب دفاع هولندا حالة من ام الركب ويتحصل على الكوره (مانيش ) ويسحب له واحد ثم يمحط بالكوره بالمرمى الهولندي كهدف برتغالي اول ..
بعد الهدف سمعت هياط وشيء مثل الهزة اللي صارت بالملحق ويوم ألتفت الا اشوف غازي القصيبي آخذ له شماغ اخوي ابو خشم وحاطها بوسط جنزه وقاعد يرقص على حبه ونص
اول ماشفته كذا صحت بصوت عالي لاشعوريا وقلت / سحبت البساط من فيفي عبده يااابو قصيب
واستمر اللعب بعد الهدف لعب داج يطفش من كلا المتتخبين حتى اني قررت اقلب القناة على قناة روتانا خليجية واعطي ( غازي ) شماغ جديده علشان يفل الوضع عندنا لكن شفته منزل راسه بالارض وحاط اصبعه بفمه ثم رجعت على المباراه وجلسنا نتابعها لين انتهى الشوط الاول بتقدم البرتغال بهدف مقابل لاشيء لهولندا وصار فيه طرد للاعب برتغالي اسمه ( كونيستا ) ..
*** الشوط الثاني ***
بدأ هالشوط بحماس هولندي وانتقل هالحماس عندنا بالملحق حتى اني مسكت يد ( عبودي ) وجلسنا نرقص محاوره ونرقص الخطوة ونرقص العرضه وجميع انواع الرقصات الشعبيه حتى طحنا على روسنا
وكان ( فان بومل ) مكثر شطة بين الشوطين لانه كل ماجته كوره صابته حراره بحلقه وشات الكوره حتى لو انه عند الاحتياط
بس للاسف كل شوتاته طلعت فالصو وطفشنا انا وعبودي وجلسنا نقص اظافر بعض بالمقراط من القهر
وشوي الا اشوف ( غازي ) قاعد يضحك ويقهقه مثل قهقهة المثقفين ومبسوط لانه يشجع البرتغال وانا ألتفت عليه وانا طفشان قلت / يرحم والدينك حاول تستغل وقتك وبدل هالضحك خذ لك موس واقعد حك المساحه الفاضيه بين فمك وخشمك كود يطلع لك شنب واذا مانفع علمني خلني اكلم لك شركة تحط لوحه اعلانية في هالمساحه الفاضيه مثل اللوحات الاعلانية اللي بطريق خريص
بعدها كعو العيال ضحك على ابو شنب حتى ان ( فايز الحول ) دق على العامل حق مزرعة اخوه وقال / بالله دبر لنا مسحاه وحراثه يوم الخميس يوم سألته ليش قال / ياخي خلنا نستفيد من ذا الاآدمي ترى الارض الفاضيه اللي بين خشمه وفمه فيها كمية سماد غير طبيعي لو نحط فيها حبوب قمح نحصد لنا ثلاثين طن وندخلها في صوامع الغلال اللي بطريق الخرج
المهم يوم التفتنا للتلفزيون الا نشوف الدقيقه وصلت للتسعين والنتيجة لازالت البرتغال واحد وهولندا صفر واروح اطب فوق المشب وآخذ لي كرتون مويه وارميه على العيال اللي بالملحق علشان نحس اننا باستاد الملك فهد
وانتهت المباراه بفوز البرتغال وخروج حلمي الابدي هولندا وحزنا بالملحق ماعدا صقيقنا ( غازي ) اللي فل والدينها وقعد يهز وماجلس الا يوم هددناه بالشروخ اللي شريناها من الجسر المعلق
والحين بعد نهاية المباراه وخروج هولندا قررت ان اخربها وانحرف واشرب دخان ابو بس وعلى من لديه اعتراض ان يتقدم باعتراضه لهيئة سوق المال خلال شهر من تاريخه
كتبه / زعيم ( حزين الدخل)
المكان / ورا المركا وجنبي بكت دخان
الساعه / وحده وبضع دقائق
وحقيقة يستاهلون البرتغال لأني من أول البطولة اشجعهم.......
أقول زعيم.... ( عبودي) ماعندهم تلفزيون ملاحظ من اول البطولة مطيح عندك
ما أدري بيتكم سبيل أو وشو بالضبط...
أبصراحة أا كان سبيل قلنا من الحين
عندي أنا وأخواني وعيال عمي وعيال عمتي وأخوالي وعيال حارتنا منذ فترة ما أحد عطانا وجه كل ماطبينا في بيت قالوا تبنا وصرنا مطاوعة والدش حرام...
فأتمنى نلقى حل أذا ممكن قبل مباراة بكرة
هارد لك الخسارة والله ان القهر مسببلي انتفاخات في بطني مع اصوات خارجه عن الارادة:D والسبب كلها من فان باستن الله يغربل هالمدرب اجل عنده نستلروي ويلعب جحلط مدري من وين جابهم |118|
مشكور زعيموة على تحليك رغم اني مقهور من البرتغالين لكن البركة في الانقليز يربوهم [/align]
زوبعه في فنجان /
الله يهردلك بالعافيه
وبما انك طلعت خاين وشجعت البرتغال فأسمح لي اقول لك / اقطع علاقتي معك وامسح رقم جوالي من عندك واعتبرني نقطة ع السطر واذا جيت تمسحني من حياتك الله يخليك امسحني بمحاية روكو واذا ماعندك ترى فيه مكتبة بالملز اسمها ( حبر القلم ) يبيعونها <--- مشروع مندوب مبيعات
اما بالنسبة لكلام نواعم أقطع اوووووم الوناسة تابعته وانا كلي شغف وترقب وكل ماحركت وجهها ميساء اصب عرق واذا تكلمت ادوخ واذا مسكت شعرها احس انها تمسك قلبي وتقرأ علي
وبعد نهاية البرنامج مسكت خشم اخوي اللي نايم واقول له / لو الخشم رجلا لقتلته
وان شاءلله كلها ستمية وعشرين سنه بالكثير ثم نقدر نهزم البرتغال
الفنان /
هلا بك ياصقيقي العظيم صاحب الصوت الشجي اللي يذكرني بعبادي الجوهر وهو توه صاحي من النوم ودابغها بكيس كورن فليكس مع الصبح
ومثل ماقال الشاعر الجاهلي / رضا تكر
اللي حصل شيء يستاهله
وبالنسبة لـ ( عبودي ) /
فأبوه كان شاري لهم تلفزيون ماركة ( سوني ) وماتجيب الا القناة الاولى والثانية وبعد العصر تجيب القناة الرياضيه وفي يوم جابوا بالقناة الاولى برنامج ( حدث في مثل هذا اليوم ) وكانو يتكلمون عن هتلر عاد ابوه مذهبه ليبرالي وكان مايداني شيء اسمه (هتلر ) وبعد ماشاف هالبرنامج جاب يد النجر وصك به التلفزيون وكسره حتى يقول عبودي / ان التلفزيون بعد ماانكسر طلع فوقه صعرور وقاموا يلفون على التلفزيون العصافير
شفت شلون تفكير عبودي بريء حد الثماله
لذلك ياليت نقف دقيقه تقديرا لهذا التفكير
واذا انت وعيال عمك وخوالك وحارتكم ناوين تجون عندنا بالملحق فأحب اقول لك /
تراي من أمس ألتزمت وصرت مطوع وقصرت بناطيلي وناوي انطل الدش من فوق السطح <--- صح يالزحلقه
والحين بعد نهاية المباراه وخروج هولندا قررت ان اخربها وانحرف واشرب دخان ابو بس وعلى من لديه اعتراض ان يتقدم باعتراضه لهيئة سوق المال خلال شهر من تاريخه
برتغالي حافي النعال ** خلى هولندا تمثال 
[/align]
