الارجنتين دفع رباعي .. لدور الثمانية مع جبن المراعي
السلام عليكم ورحمة الله وبركاته ..
من هنا ومن خلف المركا الواقعه في جنبات ملحقنا العظيم والرهيب صاحب الاثني عشر زاوية ارحب بكم من جديد وكما وعدناكم نعود لكم من دور السطعش علشان نفلها سوا ونرسم مستقبلنا مع بعض بس يرحم والدينكم اللي يبي يرسم معنا مستقبله لايجيب معه تلاوين خشبيه
واحب ايضا ان ارحب بالاخوة القاطين معي بالملحق منذو بداية كأس العالم وصاروا يتعبرون من مستلزمات الملحق وصرت اعتبرهم مثل الجينز حقي لايمكن ان استغنى عنه <-- يااما انك تشبه زي الاوادم والا رح قص اظافرك
كما لايسعني ايضا الا ان ازف لكم خبر / دخول اول امراءة معنا بالملحق علشان تتابع المباراه وكان هذا الحدث الجلل قد هز مشاعرنا وصرنا مفهين طول المباراه كل ماكحت ألتفتنا عليها وقلنا صحه
وقد كان الاخوة المتواجدين بالملحق لمتابعة مباراة ( الارجنتين والمكسيك ) هم من اليمين /
عبودي ( ياحياة الشقا ) وكان جاي وجايب معه آيسكريم وقاعد يلحس بهالآيسكريم طول المباراه صح اني تمنيت اكون آيسكريم في تلك اللحظات بس بعدين يوم فكرت قلت / لو صرت آيسكريم من بيشتري خبز للبيت علشان العشاء
وخالي بدر / صاحب الثوب العجيب لاني اول مرة اشوف ثوب فيه مخبأ من كل جهه ونستغل هذه المناسبة للفت انتباه الزكرت اللي يسوون ( كتاب جينيس ) حق الارقام القياسية علشان يلتفتون لثوب خالنا العزيز ويحطونه ضمن صفحة / عجائب الكائنات
وولد خالي بدر اللي اسمه فاطم / شاب في مقتبل العمر يعتبره ابوه الشخص الوحيد في عائلته اللي كمل دراساته العليا واخذ الشهاده الكبيرة وهي / شهادة الكفاءة المتوسطة لان كل اخوانه درسو حتى وصلوا الى صف خامس جيم الترم الاول بس لان الترم الثاني كان يجي فيه تقديم على العسكرية ويطنشون الدراسه ويصيرون عسكر بالحرس الوطني
والفتاه العجيبه / ريناد <-- صورة قلب رايح في خرايطها ويقول هذا اللي يستاهل نتعب عليه ونحبه مو عبودي
ريناد هذي هي بنت جيرانا السواريه فتاة متحرره والدليل على تحررها انها حاطه ظل فسفوري على عيونها
قابلني ابوها بعد صلاة العشاء بالحارة وقال لي / انه بيروح هو وزوجته وعياله الحمران للصناعيه يبي يوري عائلته سبب ثروته وان بنته الكبيره ( ريناد ) تبي تتابع المباراه لانها تشجع الارجنتين ومالقيت غيرك اثق فيه واطلب منك تخليها تتابع المباراه عندك بالملحق
انا يوم سمعت هالكلام قعدت احرك حواجبي واقول في نفسي / الحين شياب الحارة يقولون لعيالهم لاتماشون زعيم ولاتدخلون ملحقه وانت تبي بنتك تشجع معي حقا ان عصر المساواة قد حان
صح اني لعبت على ابوها وقلت ترى المباراة قدموها وصارت تبدأ الساعه تسع علشان تجي قبل يجون العيال للملحق وصح انها جت الساعه تسع ودخلت الملحق بس ترى كنت أبيها تجي بدري علشان اسألها وش احسن نوع مكياج لاني ابي اكشخ في زواج اخوي واخاف العيال يدرون اني اسألها عن المكياج ثم ينادوني بالحارة يالخكري <--- صدقناك
_______________________________________________
( الارجنتين ) *( المكسيك ) /
بدأت المباراة الساعه العاشره تماما بتوقيت الدخل وترى بداية النشيد الوطني للمنتخبين ماسمعته لاني كنت اصحي العيال ومعهم خالي بدر من الصدمه اللي صارت فيهم عقب ماشافوا ريناد متكيه على المركا وتشرب شاهي
صدق ناس ماعمرهم شافوا خير
ويوم ألتفت للتلفزيون الا اشوف كابتن الارجنتين ( سورين ) وكابتن المسكيك ( ماركيز ) متكين جنب بعض علشان القرعه . واسمع ( ماركيز ) بيسوي قوي قدام ( سورين ) قال له / تصدق ياسورين اني اول مانولدت كانت بيدي سبحه
رد عليه سورين وقال / عاد انت تصدق اني اول ماانولدت امي تقول كان بيدك لعبة سيارة كامري كشميري
بعد ماشفت هالكلام دريت ان العيال ناوين هياط كروي ويبون يسهرونا علشان كذ جبت ورق شام وحطيته بالشاهي وشربناه كلنا
ماامداني احط الكأسه قدام خالي بدر الا اشوف المكسيك تحصلوا على فاول عند الدقيقه الخامسه ويقومون عيال المكسيك ويشوتون الفاول ثم تصك برأس المهايطي الكبير ( بورقيتا ) اللي وجهه يذكرني بنكبات الايام ومع صكتها لرأس الماخوذ وهي اللي تأخذ الكوره لفه بالجو مثل الحمام القلابي ( الله يذكرك بالخير ياعبدالله الشيحان ) ثم تجي قدام ( ماركيز ) ابو سبحه وهو اللي يمحط والدينها كهدف مسكيكي اول .
والظاهر ان خوينا ابو سبحه ماعمره جاب هدف بحياته الا ايام حواري طريق المطار لاني اشوفه قام يخمخم خوياه ويدز لمدربهم اللي كأنه شريطي سيارات بمعارض النسيم واسمه ابو شمروخ
وبعد هالهدف بدأ الارجنتينيين بتنظيم صفوفهم بقيادة القرد ( ريكيلمي ) اللي ظبط كم كورة لكريسبو لكن كريسبو كان مكثر نشويات قبل المباراه وضيع الفرص .
وعند الدقيقه العاشره يتحصلا الارجنتين على ركنية يتقدم لها ( ريكيلمي ) ويرفعها وتجي قدام راس بورقيتا المكسيكي لكن ( كريسبو ) نقش راس المكسيكي بأطراف اصابعه ونقش معها الكوره ومادرى الا هي بالمرمى كهدف تعادل ارجنتيني تراقصت معه ( ريناد ) حتى ان تنورتها كنها طاحت شوي بس بحكم اني صاحب البيت سارعت وسترت البنت وشديت تنورتها بقوة علشان ماتطيح
واشوف ( فاطم ) ولد خالي بدر قاعد يسوي معادلات حسابيه قلت له / وش عندك ياارخميدس
ناظر فيني ثم قال / لو بيصير كل خمس دقايق هدف لمنتخب فبكذا راح تنتهي المباراه بثمانطعش هدف
يومي سمعت هالكلام وانا اتواسى بجلستي واسف الطوفريه على رأسه والحمدلله جابت مفعولها هالطوفرية لانه بعد هالكلام ماسمعت صوته لين انتهت المباراه وللحين متمدد بالملحق شكله نام
وصار اللعب بهالشوط سجال بين المنتخبين هنا هجمه وهناك هجمه لين انتهى الشوط الاول بتعادل المنتخبين بهدف لكل منهما ..
*** الشوط الثاني ***
بدأ هالشوط بحماس من الزكرت كلهم بس ماتفاعلنا مع الحماس ذا لاننا كنا مقصرين صوت التلفزيون ونتابع ( ريناد ) وهي تعلمنا / افضل اماكن السهرات بالزبداني
بعد ماانتهت من كلامها وشرحها اطال الله في عمرها ناظر فيني خالي بدر وقال / الحين جواز السفر علشان اطلعه لازم اسدد مخالفات
قلت / والله مدري بس هذي مو المشكلة المشكلة انهم بيطلبون منك صورة وانت متحجب
بعد هالكلمة ماادري وش صار لاني تمددت جنب ( فاطم ) وقعدت أحلم ان المنتخب السعودي تأهل لدور الاربعه وخسر بظلم تحكيمي
المهم بعد ماصحصحت لقيت المباراة وصلت للدقيقه تسعه وثمانين والنتيجه تعادل قلت بصوت عالي / يلعن شكلك انت وياه معطيني يد خربانه غيروا اليد وتشوفون ان مافزت <--- ثقافة بلاستيشن
وانتهى هالشوط بعد بتعادل المنتخبين بهدف لكلا منهما ..
*** الشوط الاضافي الاول ***
كنت مركز مع هالشوط من اول دقيقه لاني كنت حاس انه بيصير شيء وبالفعل تقدم المنتخب الارجنتيني للهجوم وهايطو بعنف وجماعة ( روبي ) كانوا قامطين العافيه وراجعين دفاع ..
حتى ان ( ريناد ) قالت / احبكم يالارجنتين لما تهاجمو
قال خالي بدر / بالله حبيه ورجعيه بسرعه قبل الاذان علشان مايسكرون البقاله علينا
بغيت اسف خالي العزيز بكأس جبن المراعي اللي كنت حاطه فوق التلفزيون لاني مااحب الواحد يتميلح قدامي بس تذكرت انه اخو امي وسامحته
وعندما وصلت المباراه الى الدقيقه الثامنه من الشوط الاضافي الاول توصل كوره عند سورين من الطرف الايسر ويرفعها الى ( رودريغيز ) اللي يثبتها بصدره بكل حنيه ويمحط والدينها بالزاوية اليمنى لمرمى المسكيك ماقدر الحارس يردها مع انه حاط صانسيلك بالقفازات حقته ودخلت الباب كهدف ارجنتيني ثاني ..
بعد الهدف دزيت للزاوية اللي تحت المكيف علشان اشوف شلون تتفاعل البنت مع الهدف وبالفعل كان تفاعل رائع وظلت تناقز بالملحق حتى اني حسيت ان الملحق بينفجر بأحاسيس ومشاعر ناعمه
واستمرت المباراه كذا لين صفر الحكم بفوز الارجنتين بهدفين مقابل هدف .
بعد المباراه قعدت اهايط مثل ماردونا علشان تخق معي السورية ويوم شافتني كذا وهي اللي تقعد تضمني حتى اني حسيت ان الارجنتين دولة من لادولة له
وتضامنا مع الفوز الارجنتيني شغلت اغنية ( علوش ) وقعدنا ندبك بالملحق لين سمعنا بواري عند الباب طلع ابوها الغثيث راجع من رحلته المكوكية ويوم طلعنا له / قال : ان شاءلله ماازعجتكم او ضايقتكم ؟
قلت / لا والله اعطت جو للمباراه وترى فيه مباراه باليسبول الساعه اربع الفجر خلها تتابعها عندي بعد
والحين راحت ريناد لبيتهم وراح خالي وابنه بعد وراح عبودي اللي طاح كرته اليوم
وبقيت انا متكي على نفس المركا اللي تكت عليها البنت واكتب خواطر وقصيده على ضوء القمر
ومن هنا اطالب الاتحاد السعودي بأتاحة الفرصه للبنات بمشاهدة المباريات بالملعب علشان نستمتع بكل لحظة من المباراه وسط راحة نفسيه
وتراي الحين دريت ليش ملاعب الاوروبيين تمتلي مع ان المباراه بين فريقين داجين !!
ياشيخ لو بيدخلون بنات كان مباراة الشعلة والرياض الملعب فل ويبي لك تشتري تذكرة من السوق السوداء
كتبه / زعيم صقيق ريناد
المكان / ورا المركا وجنب مركا بعض الناس
الساعه / ثنتين الا عشر
التعديل الأخير تم بواسطة : زعيم زعماء اسيا بتاريخ 25-06-06 الساعة 02:57 AM.
شوف يازعيم أنا من زمان ودي أقول لك شي
أنت أحسن واحد يكتب أنت أحسن محلل بالعالم أنت وش اقول فيك أنت أحلا واحد (( ذي قوووية))
ممكن تعزمني في محلق بيتكم بوجود ريناد
<<<<< نفسة يشوف مباراة بجنب بنت تشجع كورة عشان أذا جاب فريق اللي نشجعه قوول نفرح نضم بعض مثل اللي نشوفه بالمباريات العالمية
وخذها وعد مني لكل فاول وأوت وركنية وبلنتي وهجمة ضايعة أقوم ابوس وأحضن ومن هالأمور اللي ماتخفى على سعادتكم
ابو ملاك /
هلا والله صقيقي ابو ملاك ..
شف مسألة انك ماتابعت المباراة فهذا شيء راجع لك لكن ودي اقول لك / في حالة عدم مشاهدتك للمباراه فنحن نتكفل بتحليل المباراه من جميع تفاصيلها حتى لو يجيبون لقطة لبنت حاطه وشم بكتفها الايسر علشان تكونون مع الحدث
وشعارنا هو / ادخل داخل ملحقنا .. وعيش معنا فلتنا
وبعدين شف اني اعزمك علشان تتابع معنا المباراه جنب ريناد انس ياشيخ
الارجنتين دفع رباعي .. لدور الثمانية مع جبن المراعي 
